Vindafjordhallen
Ny milliongåve
Torsdag informerte Haugesund Sparebank styret i Vindafjordhallen SA om at dei gir ein million kroner i gåve til bygginga av den nye storstova i Vats. Vindafjordhallen SA er nå over halvvegs til å ha fullfinansiert sin del av byggekostnaden.
Dette opplyser i styreleiar Janne Urdal Aursland i eit Facebook-innlegg.
Sjå ein oversikt over tidlegare gåver her:
Annonse
Held fram arbeidet
Torsdag skreiv styreleiaren at Vindafjordhallen SA nå har klart å samle saman 11,2 millionar. Dagen etter kom det inn 100.000 nye kroner frå Tone og Olsen. Urdal Ausrlsand presiserer at det også inkluderer gåver og utstyr til bygdahuset som Vindafjordhallen SA skal drifte.
— Pengane er tildelingar frå gåvefond og gåver frå bedrifter i Vats, samt overføringar frå privatpersonar, seier styreleiaren.
Vindafjord kommune skal drifte symjehallen i det nye anlegget. Bygginga er i gang på tomta der den gamle Vindafjordhallen stod fram til brannen i 2019.
Annonse
I den politiske prosessen som til slutt enda med vedtak om å bygge symjehall og bygdahus i Vats vedtok formannskapet å halde kommunen sin finansiering av prosjektet nede i 48 millionar. Følgeleg blei det bestemt at Vindafjordhallen SA måtte skaffe 20 millionar i finansiering gjennom gåver og/eller dugnadsarbeid. Kostnadskutt i bygget har gjort at denne summen gjekk ned til 13,3 millionar. I tillegg fekk kommunen inn 3,38 millionar som del av Rogaland fylkeskommune si tildeling til kulturbygg i november, noko som fekk ned finansieringsbehovet til Vindafjodhallen SA ytterlegare.
— Me manglar nå rundt 4,5 millionar og held fram arbeidet opp mot gåvefond og andre, fortel Urdal Aursland.
