NVE vil ha meir hemmeleghald rundt kraftsystemet

Ny teknologi og auka trusselnivå mot grunnleggjande infrastruktur i samfunnet har utløyst spørsmål om kva som bør vere offentleg tilgjengeleg om det norske kraftsystemet.

I eit omfattande høyringsdokument går Noregs vassdrags- og energidirektorat (NVE)
inn for at ein skal skjerme meir av det som ikkje er omgåande synleg. Høyringsfristen er sett til 1. september.

– Endringane i trusselbiletet og den teknologiske utviklinga gjer at vi heile tida må tenkje gjennom kva i samfunnet som bør skjermast. Vi foreslår no enkelte innstrammingar i regelverket, slik at meir informasjon om kraftsystemet blir skjerma frå offentlegheita, seier vassdrags- og energidirektør Kjetil Lund.