Krav om nullutslepp for buss framskunda med eitt år

– I stadig fleire delar av transportsektoren er det no mogleg å gå over til nullutsleppskøyretøy. Vi framskundar difor kravet til nullutslepp i offentlege kjøp av buss med eitt år, frå 2025 til 2024, seier samferdselsminister Jon-Ivar Nygård.

Det kjem fram i ei pressemelding frå Samferdselsdepartementet. Det nye klimakravet vil gjelde frå 1. januar 2024 og omhandlar bussar i klasse 1. For bussar i andre klasser, gjeld framleis krava frå 1. januar 2025.

For kvar dieselbuss som vert bytt ut med elektrisk buss, vil CO2-utsleppet bli redusert med 50 tonn per år. For bussar som ikkje tilfredstiller miljøkrava, innfører regjeringa rapporteringsplikt.

Transportsektoren står for om lag ein tredjedel av klimagassutsleppa i Noreg. Allereie er det blitt innført nullutsleppskrav i offentlege innkjøp av personbilar og varebilar. Det er også føreslått krav om nullutslepp for ferjer og hurtigbåtar.