— Hausten 2021 bar preg av ein svak optimisme rundt utanlandsreisene til nordmenn, men som ein konsekvens av restriksjonar og tiltak knytt til omikronviruset har optimismen snudd. Medlemmene våre i reiselivsbransjen melder om full bestillingsstopp på utanlandsreiser etter 13. desember, seier kommunikasjonssjef Maria Østerhus Lobo i Virke.
For Noreg isolert sett oppgir 72 prosent at smittespreiinga i svært eller ganske stor grad vil vere styrande for deira val av reise dette året.
Noko mindre påverka
Generelt meiner 69 prosent av dei spurde at reiseaktiviteten i ferien blir påverka av koronasituasjonen. I 2020 svarte 74 prosent det same.
Funn i undersøkinga på slutten av 2021 tyder på at nordmenn no er litt mindre skeptiske til å feriere i utlandet enn det dei var ved førre undersøking, i desember 2020, men likevel langt under det vanlege nivået.
Hovudorganisasjonen trur det er fleire årsaker til dette, mellom anna at vaksinasjonen går framover her i landet og at Utanriksdepartementet har oppheva sitt råd om å unngå reiser til utlandet.
— Vi ser at nordmenn ønskjer å reise og oppleve utlandet, men at pandemien gjer det vanskeleg. Når smittetala er lågare, vil nok fleire bestille reiser til populære feriedestinasjonar som Hellas og Spania igjen, seier kommunikasjonssjefen.
Moglegheiter for avbestilling
Gode avbestillingsmoglegheiter blir trekte fram som viktig ved bestilling, og Virke melder at folk vil ha avbestillingsforsikring i bakhand.
— Vidare er låg smitte i destinasjonslandet og at dei sjølv har teke vaksine med på å auke sannsynet for å bestille reiser til utlandet i år, seier Maria Østerhus Lobo.
Ifølgje undersøkinga planlegg 19 prosent vinterferie i år, noko som er på nivå med tidlegare målingar. Blant desse planlegg nesten halvparten – 48 prosent – å feriere på ei privat hytte, medan 25 prosent vil dra til utlandet. Når det gjeld påskeferie, er det 34 prosent som planlegg dette, og dei fleste av dei vil bruke privat hytter eller besøkje venner eller familie i Noreg.
To av tre planlegg sommarferie
66 prosent av dei spurde planlegg sommarferie i 2022. Blant desse oppgir 43 prosent at dei vil feriere i utlandet, medan 38 prosent vil vere på privat hytte i Noreg. Viken, Vestland og Oslo er dei mest populære reisemåla her i landet, medan Spania, Danmark og Hellas peikar seg ut som utanlandske reisemål for dei som planlegg sommarferie i år.
Ifølgje undersøkinga planlegg hushalda i gjennomsnitt å bruke 40.150 kroner på ferie i 2022, noko høgare enn tilsvarande beløp – 35.350 kroner – ved førre måling i desember 2020.
Undersøkinga baserer seg på 1.561 intervju av personar over 18 år og er gjennomført av Opinion/Norstat.
Fryktar pandemikonkurs
Av medlemsbedriftene til hovudorganisasjonen Virke innan reiseliv fryktar 35 prosent konkurs som følgje av koronapandemien, ifølgje ei undersøking.
Nesten like mange – 34 prosent – har i stor eller svært stor grad utfordringar med likviditeten. Det kjem fram i medlemsundersøkinga Virke gjennomførte i desember.
Verksemdene hadde samanlikna med tida før pandemien ei kapasitetsutnytting på i gjennomsnitt 57 prosent i november og 48 prosent i desember.
56 prosent av reiselivsverksemdene opplyser at dei i svært stor eller stor grad blir avgrensa av smitteverntiltaka som vart varsla i perioden fram til og med 7. desember. 70 prosent av desse verksemdene seier det same om tiltaka som kom 13. desember.
— Dette illustrerer at situasjonen har vorte stadig meir krevjande for bransjen som følgje av smitteverntiltaka som vart kommunisert og innført i desember 2021, opplyser Virke.
