Det norske reisefølgjet på 190 personar som har chartra eit fly ut av Israel, planlegg å reise frå landet klokka 17 tysdag.
Det skriv reiseleiar Bjarte Ystebø i ein e-post tidleg tysdag morgon.
– Med kanselleringa i går friskt i minne tek vi ingenting for gitt, men vi håpar og ber om at dette skal lykkast, skriv han.
Bjarte Ystebø er reiseleiar for ei gruppe med Israel-venner frå den Internasjonale Kristne Ambassade Jerusalem (IKAJ).
Dei hadde vore i Israel over ein lengre periode. Det var Ystebø som hadde chartra flyet frå Cyprus Airways, som skulle gå direkte frå Tel Aviv til Oslo.
Dei er ei gruppe på 71 i reisefølgjet, og la ut melding på Facebook søndag om at dei hadde plass til fleire.
– Flyet vart raskt fylt opp. Vi fekk ein straum av førespurnader og måtte til slutt gi opp å svare all. Vi sit med kjensla av at vi kunne fylt dette flyet to gonger, sa reiseleiaren til Dagbladet måndag.
I e-posten skriv Ystebø at den klare meldinga frå Utenriksdepartmentet er at folk må hjelpe seg sjølv.
– Vi prøver å hjelpe kvarandre, slik at alle kjem seg heim, seier han.
Reiseleiaren seier at dei har eit godt samarbeid med den lokale israelske operatøren sin som sørgjer for logistikken på bakken i Israel, og varetek tryggleiken i dialog med israelske styresmakter.
