Vindafjordhallen
Fleirtal for å bygge ny Vindafjordhall
Etter fleire gruppemøte torsdag kveld er det eit solid fleirtal i Vindafjord kommunestyre for å gå over i byggefasen for symjehall og bygdahus-prosjektet i Vats.
I eit felles gruppemøte mellom partigruppene til Ap, Sp og KrF blei det klart at alle tre partia kjem til å stemme for byggestart. Dette bekreftar gruppeleiar Wenche S. Lilleland i Vindafjord Ap. Dei tre partia har fleirtal i kommunestyret og er følgeleg ikkje avhengige av støtte frå fleire parti for å få gjennom vedtak.
Kan skifte meining
Annonse
Anna Klette Steinsland opplyser at også ho kjem til å stemme for å gå over i byggefasen. Kommunestyremøtet kommande tysdag blir siste gong ho møter som Bjoa Bygdeliste sin einaste representant. Frå oktober blir ho ei av tre i Vindafjordlista si kommunestyregruppe.
Guri Ravatn (SV) vil i utgangspunktet stemme for kommunedirektør Yngve Folven Bergesen sitt forslag, men er open for at dette kan endre seg om det kjem fram noko som skulle tilseie det i kommunestyremøtet.
— Vindafjord SV er ikkje representert i formannskapet som til nå har handsama saka. Me er uroa for om investeringsramma held. Me kunne og tenkt oss ei meir detaljerte utgreiinga av driftsutgiftene, som tal stillingar, krav til badevakter, teknisk personell med vidare. Samtidig må me stola på at administrasjonen og dei partia som har følgd saka tettare, har gjort kloke val til nå. Me vil difor truleg stemma for bygging. Eventuelt nye opplysningar i møtet kan føre til anna standpunkt, fortel Ravatn.
Mats Årvik seier at Frp vil sjå det litt ann når saka blir behandla på tysdag.
Annonse
Sklie viktig
Saka skal behandlast i formannskapet og kommunestyret kommande tysdag. Etter at Vindafjordhallen i Nedre Vats brann ned i 2019 har ei potensiell attreising vore eit heitt tema i Vindafjord-politikken. I februar annonserte prosjektleiar Frode Eike at kommunen har slutta å kalla det kommande bygget Vindafjordhallen, og at det vil komme ein namnekonkurranse.
Etter ein lengre samspelsfase mellom Vindafjord kommune og totalentreprenøren GL Prosjektservice la kommunedirektør Yngve Folven Bergesen fram det endeleg forslaget til nytt signalbygg i Vats. Særleg kommunedirektør sitt forslag om å ta sklie inn i prosjektet har blitt positivt tatt imot. Gruppeleiar Modolf Haraldseid i Høgre fortel at partiet kjem til å stemme for forslaget.
— Dette bygger på ramma som formannskapet gav i juni, sjølv om totalramma blir auka. Me meiner også at sklie vil vere såpass viktig for besøkstal og dermed inntektene at den bør komme på plass nå, seier Haraldseid.
Les om forslaget her:
