Fleire jublar for nytt basseng

— Det er kjempebra at det er fleirtal for å bygge. Me vil ha tilbake det me har mista, seier Linda Nesheim Sandvik (37) på veg inn på Shell Knapphus saman med dottera Liva (10) rundt lunsjtider laurdag.

Ho kjem frå Vats, men bur i dag i Vikedal.

Spørsmålet om å gå over i byggefasen på symjehall og bygdehus i Vats-prosjektet skal opp i formannskapet og kommunestyret kommande tysdag. Etter at dei politiske partia i Vindafjord hadde sine gruppemøte torsdag kveld er det klar at det går mot eit breitt politisk fleirtal for bygging.

Gode minner

Glede går igjen hos dei som blir spurt om reisinga av eit nytt bygg i Nedre Vats der Vindafjordhallen stod fram til brannen i 2019. Gullaug Velde hugsar tida då barna hennas brukte symjehallen. Ho minnast også bygdahuset som blant anna hadde ein kafé.

— Ei av døtrene mine gifta seg der, fortel Velde.

Ho synest det er heilt fantastisk at byggast eit nytt signalbygg i bygda, og trekk særleg fram at det er bra for barnefamiliar og skular.

— Dette blir ikkje eit bygg for berre Vats, men heile Vindafjord, meiner Velde.

Dette synspunktet deler Helen Hustoft, som er på handletur på Joker Vats litt seinare på dagen. Hustoft kjem frå Vats, men bur i dag i Sandeid. Ho trur symjehallen blir til nytte også for folk i Sandeid. Sjølv har ho mange minner frå den gamle Vindafjordhallen.

— Sonen min var litt å svømte, mens eg var meir i bygdahuset, fortel Hustoft.

Samlingspunkt

Ein annan som er positiv til fleirtalet for bygging er Paul Fuglestein. Han har mykje kjekke minner frå både symjehallen og bygdahuset i heimbygda si gamle storstove.

— Det var der det skjedde. Bygdahuset var samlingsplassen for bygda. Blant anna idrettslaget haldt til der, fortel Fuglestein på veg inn på Extra Knapphus på laurdag.

Prosessen frå brann til det som etter alle solemerke blir eit byggevedtak i kommunestyret har vore lang og bratt. Ein har vore gjennom forsikringsoppgjer og debattar knytt til kostnadar på bygget og drifta. Ei av dei som har kjempa hardast for prosjektet er styreleiar Janne Urdal Aursland i Vindafjordhallen SA.

— Eg er veldig glad for at det nå ser ut til å bli eit klart fleirtal i kommunestyret på tysdag, og at fleire av partia i opposisjon også støtter kommunedirektør Yngve Folven Bergesen sitt forslag. Nå gler me oss at det endeleg blir byggeaktivitet på branntomta som har stått der som eit opent sår i over fire år, seier Aursland dagen etter gruppemøta.

Ho håpar symjehallen og bygdehuset blir eit tilbod som heile Vindafjord og Haugalandet vil bruke aktivt.

— Dette blir eit flott bygg med eit fantastisk badeanlegg som også vil ha sklie klar frå dag ein, seier styreleiaren.

Kommunen skal stå for drift av symjehallen, mens Vindafjordhallen SA skal drive bygdahuset. Les om Folven Bergesen sitt endelege forslag til ny hall her: