Fekk vist fram storstova

— Det er ein veldig flott hall og eit kjempeflott bygg, seier Tysvær-ordførar Monika Lindanger.

Bakgrunnen for besøket til Lindanger og fleire ordførarar, varaordførarar og kommunedirektørar var Haugalandsrådet sitt møte i bygdahuset tysdag. Det var òg eit fagmøte om matberedskap på Haugalandet.

— Mykje for pengane

På slutten av lunsjpausen fekk møtedeltakarane høve til å vere med på ei omvising i symjehallen. Lindanger synest det var kjekt å bli invitert inn og sjå kva dei har i Vats si gjenreiste storstove.

— Eg likte akustikken i symjehallen godt, fortel Tysvær-ordføraren.

Prosjektleiar Frode Eike i Vindafjord kommune leia omvisinga. På spørsmål frå konstituert kommunalsjef Eileen P. Selland for utvikling og drift i Etne kommune fortalde han om korleis bygget blir varma opp av flisfyringsanlegget like ved.

Elevar frå Skjold skule hadde symjing då gjestane var på omvising. Barna såg ut til å kose seg i vatnet, medan dei vaksne lot seg imponere av det store hovudbassenget med sklie og det mindre opplæringsbassenget. Haugesund-ordførar Nils Konrad Bua omtala det som ein utruleg flott hall.

— Dei har fått mykje for pengane, meiner Bua.

Totalkostnaden for bygget er på rundt 210 millionar kroner, ein god del finansiert gjennom forsikringsoppgjeret etter den gamle Vindafjordhallen som brente ned i 2019.

Felles strategi

Også på møtet gjennom dagen var det god stemning mellom kommunetoppane i bygdahuset. Haugalandsrådet er den einaste formelle møteplassen mellom kommunane i regionen på øvste leiarnivå. Dette er ein felles arena for strategisk samhandling, erfaringsutveksling og prosjektutvikling på saksområde som er viktige for heile regionen. Karmøy-ordførar Leiv Arne Marhaug er leiar, og Haugaland Vekst er sekretariat for rådet.

Det interkommunale politiske rådet (IPR) består av ordførarar og kommunedirektørar frå regionen sine ni kommunar, samt ordførar og fylkesdirektør i Rogaland fylkeskommune. Kommunane er Etne, Vindafjord, Bokn, Sauda, Sveio, Utsira, Karmøy, Tysvær og Haugesund. Alle kommunane, forutan Sauda, hadde ein ordførar eller varaordførar på plass i Vats denne tysdagen.

Rådet tek opp regionale problemstillingar og samkøyrer tiltak og aktivitetar til det beste for regionen. Stortingsrepresentantar og andre relevante aktørar blir òg inviterte med på møta.

Saman for veg

Vindafjord-ordførar Ole Johan Vierdal starta møtet i heimbygda med å fortelje om historia til den gamle og den nye Vindafjordhallen. Deltakarane høyrde innlegg om mat og landbruk og om havvind, og stilte spørsmål til sentrale aktørar på felta (Grannar kjem tilbake med meir om desse temaa).

Mot slutten var det tid for felles formannskapsmøte og status frå rådet sine ressursgrupper. Dagleg leiar Sigmund Lier i Haugaland Vekst fortalde om planar for å reise til Oslo og møte relevante instansar for å tale Haugalandet si sak. Vierdal understreka at det er kjempeviktig at Haugalandet viser igjen og held kontakten med sentralmakter som departement.

Etne-ordførar Mette Heidi Bergsvåg Ekrheim fortalde at Etne og Vindafjord, i samarbeid med Haukelivegen AS og Næringsforeningen Haugalandet, har planar om å informere nye stortingsrepresentantar om prosjektet E134 Bakka–Solheim. Lier løfta spørsmålet om Haugaland Vekst skal arrangere den årlege vegkonferansen i Tysvær i 2026. Han viste til at utbyggingsdirektør Kjell Inge Davik i Statens vegvesen har oppmoda dei til å aldri slutte å samle dei lokale kreftene til ein slik konferanse – noko møtedeltakarane i Vats verka samde i.

— Me treng veg, med ein skikkeleg E134, sa Karmøy-ordførar Leiv Arne Marhaug.

Han peikte på viktigheita av veg i eit beredskapsperspektiv, og det nye NATO-kartet som blei vist av Monica Dahlmo frå Statsforvaltaren i Rogaland tidlegare på møtet. Bergsvåg Ekrheim gav eit stort amen til Marhaug sine betraktningar og slo fast at rådet ønskjer at konferansen held fram. Lier konkluderte med at det blir vegkonferanse i 2026.

Frå vegkonferansen i 2025:

Stas med besøk

Gjennom dagen var det tydeleg at kommunane på Haugalandet ser stor verdi i regionalt samarbeid. Mellom anna vedtok dei å sende ein felles uttale om myrforskrifta, som er på høyring. Det meste gjekk radig for seg gjennom dagen, og møtedeltakarane verka fornøgde.

— Vindafjord skal ha applaus for dagen, sa Lier i avslutninga av møtet.

Dagleg leiar Karine Klungland i bygdahusdelen av Vindafjordhallen hadde ein hektisk dag med to møterom i bruk. Etterpå var ho godt nøgd med besøket frå leiinga i regionen.

— Det er veldig stas å ha dei her. Å arrangere store møte er kjekt, og denne gongen fekk me to, seier Klungland.