Vindafjordhallen
Får milliongåve
Torsdag vedtok Regional-, kultur- og næringsutvalet i Rogaland fylkeskommune å gi 1.620.000 kroner til symjehall- og bygdahus-prosjektet i Vats. Utvalsmedlem Håvard Rørtveit (H) er glad for at fylket kan vere ein god støttespelar for slike prosjekt.
— Symjehallen og bygdahuset i Vats er eit stort spleiselag og det er kjekt at og fylket kan bidra, seier Håvard Rørtveit (H).
Bygginga av den nye storstove går føre seg for fullt:
Annonse
Lettar trykket
Pengane er ein del av fylket si ordning for tilskot til kulturbygg. I fjor fekk den nye storstova i Vats 3,38 millionar, slik at det nå har fått til saman fem millionar frå fylket.
— Her ligg det og mykje bra arbeid frå kommunen som har søkt. Nå gler eg meg til å sjå resultatet, fortel sandeidbuen Rørtveit.
Etter planen skal symjehallen og bygdahuset overleverast frå totalentreprenøren GL Prosjektservice 30. april 2025. Totalprisen for bygget er 209 millionar. Tildelinga på 1.620.000 blir trekt frå den eksterne finansieringa i budsjettet, og lettar slik trykket på Vindafjordhallen SA, som har fått i oppgåve å samle inn desse midlane.
Annonse
— At fylket gir pengar er kjempebra. Det gjer at summen me må inn med går litt ned, seier styreleiar Janne Urdal Aursland i Vindafjordhallen SA.
Sidan det har dukka opp litt utgifter i samband med bygdehusdelen dei skal drifte, er det ikkje heilt avklart kor mykje som står at. Styreleiaren fortel at dei har god dialog med kommunen. Vindafjord kommune skal stå for drifta av symjehalldelen.
