Får millionar frå fylket

Dette offentleggjorde fylket i ei pressemelding torsdag.

Pengane er ein del av 21,5 millionar som Rogaland fylkeskommune gir ei tildeling til fem kulturbygg. Dei andre prosjekta som får støtte er ny scene på Haugesund teater i Haugesund kommune (ti millionar), Kulturbanken i Time kommune (645.000), fleirbrukslokale for kultur i ny ungdomsskule på Frakkagjerd i Tysvær kommune (2.933.000) og Festiviteten i Haugesund kommune (4.627.000).

Sandeidbuen Håvard Rørtveit (H) blei nyleg valt inn i Rogaland fylkesting. Han var med å behandle forslaget om tilskot til den nye Vindafjordhallen.

— Det er jo spesielt kjekt å få bidra til ei så positiv sak i mitt første utvalsmøte på fylket. Eg håpar at desse pengane kan vere med å skape eit godt samlingspunkt i kommunen, seier Rørtveit.

Nærmar seg innsamlingsmål

For dagleg leiar Janne Urdal Aursland i Vindafjordhallen SA er det svært gledeleg at fylket gir pengar til Vats si nye storstove.

— Dette gjer at vårt krav til bidrag inn i bygget stadig blir redusert, seier Urdal Aursland.

Formannskapet vedtok først at Vindafjordhallen SA måtte skaffe 20 millionar i finansiering gjennom gåver og/eller dugnadsarbeid. Kostnadskutt i bygget har gjort at denne summen gjekk ned til 13,3 millionar. Fire millionar frå Sparebanken Vest, tre millionar frå Hatteland Gruppen, og ein million frå Knapphus Energi, pluss tildelinga frå fylket gjer at det nå er rett under seks millionar som står igjen.

Urdal Aursland opplever eit godt engasjement frå folk og bedrifter i Vats, og er veldig glad for alle bidrag. Vindafjordhallen SA skal drifte bygdahus-delen av det nye storbygget i Vats, mens Vindafjord kommune skal drifte symjehallen. Urdal Aursland seier at kvar krone dei kan få i støtte til ansvaret dei har for å innreie bygdehuset med alt som skal til av stort og smått for å lage til ei storstove for store og små arrangement teller.

Nyleg annonserte fleire bedrifter at dei gir gåver til bygget.