Byggjer ny heim i sentrum
— Huset er ei lita perle om det fungerer. Me ser føre oss at det kan bli ein kultursamlingsplass, seier leiar Ingvar Gjærde i Fokus Sandeid.
Helgevoldhuset ligg midt i Sandeid sentrum, med Hustvedt & Skeie transport og Coop Prix som nære naboar. Det har to etasjar med fleire rom og stor boltreplass både oppe og nede.
Ifølgje Fokus Sandeid si informasjonstavle står huset i dag i tilnærma original form slik det blei bygd rundt 1855. Det blir kalla Helgevoldhuset etter Hans Helgevold. Huset har også vore kalla Blidensol og Meidellhuset, etter Samson Henning Meidell som bygde det. Han hadde kongeleg løyve til å driva handel som vanleg landhandlar og sal av øl og vin. Sidan har det blitt brukt til ulike formål, som tannlegekontor og bustadhus.
