Avlivar og kastar 27.500 killingar rett i søpla

Over halvparten av alle friske geitekillingar som blir fødd kvart år blir avliva og kasta som avfall rett etter fødselen, skriv NRK.

Geit blir i hovudsak halde for mjølkeproduksjon i Noreg, men for å produsere mjølk bør geita få ungar ein gong i året. Ofte får ho to killingar kvar gong, og kjøtet hamnar sjeldan på norske middagsbord. Årsaka er ifølgje NRK manglande etterspurnad etter kjøtet. Nortura seier til NRK at dei ikkje kan forsvare å betale meir for ei råvare enn det dei greier å omsetje ho for i sluttmarknaden.

Det ligg heller ikkje føre planar om inkludering av geit i marknadsreguleringa for kjøt.