Veterinærane Charlotte Eikeskog Ravnås (t.v.) og Johanna Mortensen i formannskapet i Vindafjord 3. juni.
FOTO: SVEIN-ERIK LARSEN
Aukar støtta til veterinærar
Vindafjord har slite med å få veterinærar til å slå seg ned i kommunen, og ingen nye har etablert seg over tid sidan 1990-talet. Tysdag vedtok formannskapet å auke ramma for tilskot til dei frå 125.000 til 500.000 kroner.
— Det er ei kjempeviktig sak, sa Nina Karin Ramsfjell (Sp) i formannskapsmøtet.
Eit samrøystes formannskap vedtok at det blir sett av 500.000 kroner i kommunalt tilskot for veterinærvakta for 2026–2029. Dette blir delt mellom dei fire veterinærstillingane i kommunen.
Dagens avtale går ut 31. desember. Vedtaket gav kommunedirektør Yngve Folven Bergesen ei ramme for tilskotet før kommunen går i gang med ei offentleg anskaffing av veterinærvakt for ein ny periode.
