Andre bollar i barnehagen

Ein kan rett og slett lukta seg fram til skulekjøkenet på Karmsund vgs i Haugesund, som for høvet er utlånt til barnehagetilsette i Vindafjord kommune. Dufta av fersk middag set seg i nasebora og det blir ei utfordring å berre sjå, og ikkje røra, eller smaka for den del.

Dei lekraste rettar er på veg opp i forskjellige serveringsfat, og side om side ligg laksewraps, fiskekaker, tacolaks, torskegryte, fiskeburgarar, fiskesuppe, fiskepinnar og laksesalat, som gjerne er miksa med reker, brødkrummar, cornflakes, ris, pasta, grøn salat og brød. Det er til å få vatn i munnen av, og det beste av alt er at desse rettane er enkle å laga i ein travel barnehagekvardag.

— Dette har vore eit svært nyttig kurs, der me har fått både teoretisk informasjon i tillegg til at me har fått prøva oss i praksis. Det har eg lært mykje av, og det var ei aha-oppleving at det var så enkelt å få til, seier Gerd Marit Rugtveit frå Vats barnehage.

Med seg på kjøkenet har ho Hege Imsland Birkeland frå Imsland barnehage, og Annette Svendsen frå Skjold barnehage. Saman med 17 andre barnehagetilsette frå Vindafjord, fekk dei nytta seg av matkurset som kosthaldsprogrammet Fiskesprell arrangerer.

Tips og motivasjon

Kurset blir arrangert av Rogaland fylkeskommunen som ein del av det regionale helsearbeidet, og er eit gratis opplegg over éin dag med teori og praksis, fortel Berit Hetland i Vindafjord kommune, som er koordinator for kurset.

Audun Moksheim er kokk og faglærar ved linja for restaurant og matfag ved Karmsund vgs, men denne dagen var han mentor og lærar for dei barnehagetilsette frå Vindafjord. Han håpar kursdeltakarane får både tips og motivasjon som dei kan bruka i praksis i barnehagane dei jobbar i, og målet er å få sjømat til å bli populært igjen hos barn og unge.

Barn og unge et generelt mindre sjømat enn det som er tilrådd frå helsemyndigheitene, og går derfor glipp av viktige helseeffektar. Fiskesprell er eit ledd i det førebyggjande folkehelsetiltaket, men det skal også bidra til å utjamna sosiale ulikskapar i kosthaldet til barna.

Mat frå botnen av

Mens Audun Moksheim tar seg av den praktiske læringa, er Merete Ree Frafjord ansvarleg for teoridelen. Ho er til dagleg diabetessjukepleiar og kosthaldsrettleiar i Stavanger. Moksheim opplyser at det er viktig å snakka om kvifor fisk er viktig og korleis ein skal få tid til å laga fisk i kvardagen, når det både er travelt og ein gjerne har eit stramt budsjett å halda seg til.

— Responsen på slike kurs er veldig positiv. Mange blir overraska over kor lett det er å laga maten frå botnen av, og kor lett det er å tilpassa matlaginga til barnehagekvardagen. Oppskriftene dei får, er også tilpassa 15 —20 barn, seier ho.

Fisk — aldri feil

Både Gerd Marit Rugtveit, Hege Imsland Birkeland og Annette Svendsen er blitt inspirert av det dei har lært denne kursdagen.

— Fokus på fisk er aldri feil, og når det skal så lite til å få fram gode smakar, blir det ein motivasjon. Ofte blir det til brødmaten barna får fisk, gjerne gjennom makrell i tomat, fiskekaker på skiva eller liknande, så nye idear til varm mat er kjekt, seier Svendsen, og legg til at dei også har fått gode tips om korleis dei kan gjera dette meir økonomisk.

Hege Imsland Birkeland seier det ofte kan bli forenkla fisk» når dei har hatt middag i barnehagen, som til dømes ferdige fiskepinnar. Men denne dagen har dei lært korleis dei kan laga denne retten frå botnen av, gjerne rulla i cornflakes, noko som visstnok skal vera veldig godt.

Nytt kurs til våren

No skal dei barnehagetilsette tilbake i barnehagane sine og setja sine nye kunnskapar ut i praksis. Til våren skal dei på ny kokkelera med Audun Moksheim, men då skal dei gjera det ute i naturen i samarbeid med Friluftsrådet Vest.