Trygg kommunal kai ved Eikemoland

Ope brev til kommunestyret i Etne kommune

Eg hadde trudd at eg ikkje skulle skriva meir om Eikemo i avisa. Då eg las kommunedirektøren sitt framlegg til budsjett – Ikkje ei krone til rehabilitering av kai ved Eikemoland» – måtte eg ta pennen fatt igjen.

Eg vonar de ansvarlege politikarar gjer om på budsjettet og løyver dei kronene som skal til for å rusta opp den kommunale kaien ved Eikemoland. Det er de som har ansvaret for liv og helse.

Kaien er bygd av folket der inne, i ei tid då det berre var to tohjulstraktorar i bygda. No har bøndene store firhjulstraktorar som skal ut på kaien. Big bag på 800 kilo, kanskje meir, skal på land. Svikta ikkje bygda – ver dykkar ansvar bevisst.

I desse dagar blir det frå Storting og regjering dagleg understreka kor viktig beredskap og tryggleik er for folk i heile landet. Mobildekninga er det Egil Kambo som har sørgt for. Eg vil òg minna om alle kraftpengane som har rulla – og framleis vil renna – inn i kommunekassa.

Utflytta Eikemokvinne
Liv Eikemo Opdal