Skremsel om vindkraft

Av avisinnlegga i Grannar ser eg at somme av sambygdingane mine er blitt skræmde av utsiktene til vindkraft i Vindafjord. Og sett frå eit historisk perspektiv er det vel ikkje så rart: Me har ingen tradisjonar for vindkraft - i motsetnad til våre «naboar» på Kontinentet. Der har dei levd med vindmøller i hundrevis av år, og der byggjer dei nye og større vindmøller i stort tempo – i omstillinga til fornybar energi.

Her i Vindafjord sit me på baken og er imot det meste . . . Nei, sjølvsagt gjer me ikkje det! Me ser framover og erkjenner at framtida krev meir energi, rein energi! Då toler me å sjå nokre vindmøller!

I Fitjar var motstanden mot vindkraftplanar større enn her – med påstandar om industrialisering og rasering av naturen. I dag er vindturbinane på plass – og motstanden borte. For folk flest kjem seg nå til fjells, til og med trillande på barnevogner. Og Fitjar kan gje betre tilbod til sine innbyggjarar enn mange andre kommunar.