Tilbake på vinnarsporet i toppkamp

Allereie i kampens første minutt opna Ingvild Ove Skare scoringsballet for Grannar-distriktet sitt beste kvinnelag. To scoringar frå Thea Karoline Blikra (21- og 30 minutt) sørga for at heimelaget hadde full kontroll innan ei halvtime spelt.

Ei straffescoring frå Thea Karoline si søster Gjertrud Blikra (32 minutt) og eit mål frå Oda Wangberg (39 minutt) sørga for at Skjoldar/Vats/Vik/Vind gjekk til pause med ei komfortabel 5-0-leing. Gjestane fekk eit trøystemål av Oda Heringstad etter 83 minutt, men dei kom aldri nær å true samarbeidsklubben.

Med sigeren klatrar Skjoldar/Vats/Vik/Vind over Åkra på tabellen på betre målforskjell i 4. divisjon avdeling 2. Enda betre målforskjell har serieleiar Torvastad 7ar som slo Ølen på bortebane på måndag. Tettrioen står med 21 poeng på åtte kampar. For Ølen, som ligg på sjetteplass med sju poeng på sju kampar, blir det ei ny tøff oppgåve i neste kamp, når dei møter eit revansjesugent Åkra borte kommande onsdag. Same kveld tek Skjoldar/Vats/Vik/Vind imot Kopervik 2 i Skjold.