Sport
Blei inspirerte i fotballfest
Mange tok turen då etnebuen Lukas Tendal (14) og FKH sitt G15-lag spelte seriekamp mot Viking i Ølen laurdag. For dei yngre var det tydeleg stas å få sjå spirene til to Eliteserie-klubbar på nært hald.
— Det er veldig kjekt å sjå FKH i Ølen, seier Matas Cibauskis, som var på plass saman med fleire kameratar.
Dei siste åra har FK Haugesund lagt fleire aldersbestemte kampar til Ølen. Dermed har Cibauskis fått sjå FKH sine talent i aksjon tidlegare òg. Denne gongen vann FKH 3–2 på Sparebank 1 Sør-Norge Stadion i Ølen.
Annonse
Lukas Tendal (14) frå Etne og Even Søreide Sandvik (15) frå Skjold starta på benken for FKH. I tillegg spelar vanlegvis ølensbuen Sander Hauge Christiansen (15) på FKH G15. Han måtte stå over kampen i heimbygda grunna skade. I fjor fekk han gleda av å skåre for FKH i Ølen i ein siger mot Brann.
Snudde mot serieleiaren
Vêret var perfekt denne laurdagen, og Ølen IL stilte med kiosk og speaker. Folk sat og stod rundt heile banen, og fleire hadde teke plass på terrassen til klubbhuset. Truleg var det godt over 50 tilskodarar.
Kampen i den nasjonale G15-serien blei både fartsfull og spanande. FKH tok leiinga etter 13 minutt då Henrik Nedrebø Myhre skåra etter ein kontring. Viking svarte med to mål før pause: Sahil Khan utlikna etter 29 minutt, og Iver Bilstad heada inn 1–2 på corner sju minutt seinare. Det stod seg til pause.
Annonse
I andre omgang tok FKH over. Linus William Jonsson utlikna til 2–2 etter ein corner i det 59. minutt. Berre to minutt seinare kom Kristian Warholm på eit flott raid og plasserte ballen i lengste hjørne. Snuoperasjonen var komplett. Lukas Tendal kom inn og spelte dei siste 20 minutta av kampen. Som spiss bidrog han til å halde trykket oppe i sluttfasen med toppress og løp på alle ballar som kom i hans retning.
— Det var kjekt å få prøve seg på slutten og spele i Ølen. Me leier og kjempar sigeren i land, seier Tendal.
Han gler seg over at FKH klarte å ta med seg ein siger i lokalderbyet og får høve til å komme seg oppover på tabellen. Før kampen leia Viking serien med 18 poeng etter sju kampar, medan FKH låg på femteplass. Med sigeren klatra dei til fjerdeplass med ti poeng etter åtte kampar. Viking held fram på topp, trass tapet.
Fin kombinasjon
Etter G15-kampen laurdag, venta ein G14-kamp søndag for Tendal. Så langt i år har det blitt tre kampar for G14-laget og seks kampar og tre mål for G15-laget. Tendal er framleis Etne IL-spelar og har spelt seks kampar og skåra tre mål for Etne sitt G14-lag i 1. divisjon i år.
— Å kombinere FKH og Etne går greitt. FKH legg opp til at eg slepp treningar som kolliderer, slik at eg har høve til å spela kampar for Etne, fortel Tendal.
Annonse
Planen er å spele for begge iallfall fram til vinteren. På sikt håpar han å kome inn på Haugesund Toppidrettsgymnas (HTG), og målet er å nå A-laget til FKH – og kanskje vidare.
Godt samarbeid
Lukas Tendal sin storebror Nikolai (16) fekk proffkontrakt med FKH i 2024, og flytta til Haugesund for å gå på HTG frå 10. klasse. I år har spissen spelt kampar og skåra mål for både G17- og G19-laget. Søndag ventar ein ny kamp i Ålesund. Lukas er glad for å ha ein storebror han kan sjå opp til og spørje om råd. Foreldra Odd Rune og Katarzyna var til stades i Ølen.
— Det er travelt, men kjekt å ha to søner i FKH. Me samarbeider med andre lokale familiar om køyring, så det blir berre ein eller to turar i veka til Haugesund, fortel Odd Rune Tendal.
Lagkameratane til Lukas på Etne G14 – Herman Ekornrud, Robert Matre, Joachim Veland Becker og Jone Sævareid – tok turen til kampen. Sævareid synest det er kult å ha ein lagkamerat som spelar på dette nivået. Deira årskull er eit av få i Etne IL dei seinare åra som har klart å ha to lag i seriespel i så høg alder.
— Me får det til fordi me samarbeider godt, seier Matre.
Annonse
I 2024 krona dei innsatsen med siger i Etnecup. Becker spelar i likskap med Lukas Tendal både i Etne og FKH. Keeperen har stått fire kampar for G14-laget til FK Haugesund i år. Han fortel at det er travelt, men det går fint å spele i moderklubben og elitelaget på Haugalandet samtidig.
Mange lokale talent
Etne og Vindafjord har dei siste åra levert mange spelarar til FKH, både gutar og jenter. Nokre har òg vore med på landslag. På FKH sitt kvinnelag i 1. divisjon er Kristine Hustveit Nybru (19) frå Vikedal kaptein. Ho har fleire landskampar bak seg. Lagvenninna hennar, Solveig Hetleflåt Bråthen (22) frå Etne, er også ein viktig spelar.
På midtbana hos G15 spelar Sander Hauge Christiansen (15) frå Ølen. Han gjekk frå Ølen IL til FKH i 2023 og har skåra to mål på seks kampar i 2025. Even Søreide Sandvik (15) frå Skjold spelar både på FKH G15 og Fjordar G14. For FKH har han spelt fem kampar så langt i år.
I 3. divisjon for FKH2 spelar etnebuen David Øren (19). Han går siste året på HTG. Lillesystera Lilly Øren (15) er også i klubben, etter å ha meldt overgang frå Etne IL i år. Ho har spelt fem kampar for FKH2, tre av dei i 3. divisjon, og har fått spele ein treningskamp for førstelaget. Ho har seks aldersbestemte landskampar – tre kvar for J14 og J16.
Julie Håheim (18) frå Etne er keeper på FKH2 og spelar i 3. divisjon. Ho har spelt åtte kampar i år, sju i serien. I fjor spela ho i 2. divisjon. Ho var òg ei av tre lokale jenter som deltok i Heston Cup i London med NSU (Norsk Spillerutvikling). Der spelte også Britt Maria Furseth (14) og Solveig Skjold (14) frå Fjordar IL. Dei sikra ein sterk 3.-plass.
Fleire spelarar frå Fjordar og Skjoldar skal delta i internasjonale turneringar i sommar. Viljar Matre (14), midtbanespelar for Fjordar G14, skal til Benidorm i juli for å spele Costa Blanca Cup – ein turnering med lag frå over 20 land.
Også Liverpool blir ein arena for lokale talent på turneringar med NSU. Leon Tobias Vårvik Torgersen (12), som spelar både back, kant og midtbane, skal møte lag som Liverpool, Sheffield United og favorittlaget hans, Leeds United. Yngstemann i reisefølgjet er Lukas Dahl-Saravia (11), som speler for Skjoldar G11. Han skal også til Liverpool og møte lag som Aston Villa, Liverpool og lag frå Nederland.
