Vil på Stortinget

— Eg har vore i tenkeboksen sidan i sommar og bestemte meg sundag for å seia ja. Omsynet til familie; sambuar og to born, gjorde dette vanskeleg, seier Steinulf Tungesvik til Grannar.
Han er i dag leiar i Hordaland Sp og til dagleg advokat i Bergen der familien er busett. Tungesvik har alt markert seg i politikken nasjonalt, først som statssekretær i Sosial- og helsedepartementet og seinare som statssekretær i Samferdselsdepartementet for sitjande regjering; til saman fem år.
I Etne er det jubel for at Steinulf Tungesvik melder seg på i nominasjonskampen.
— Me har lenge prøvd å overtala han til å seia ja, og vil nå jobba for hans kandidatur og for topplassen som blir ledig etter Rune Skjælaaen, seier Ingvor Gundegjerde, formannskapsmedlem i Etne og styremedlem i Hordaland Sp.
Tungesvik vil truleg få støtte frå mange lokallag i fylket, men møter kamp; blant anna frå Kjersti Toppe, som har solid støtte av Sp-laga i Bergen.
42-åringen har ikkje sett som vilkår om topplassen og vil heller ikkje spekulera i utfallet av nominasjonsprosessen i Hordaland. Først 29. november blir det avgjort kven som blir fylkeslaget sin toppkandidat til Stortingsvalet neste år.
Faren, Hans Olav Tungesvik, sat på Stortinget i to periodar fram til 1985. Gunnar Berge (Ap), opphavleg frå Etne, er den andre frå kommunen som har vore på Stortinget i nyare tid.