Tine er i dag klar marknadsleiar i meierisektoren.
Foto: Berit Roald / NTB/ NPK
Vil gjerne har større konkurranse i meierisektoren
NPK: Medan 98 prosent av mjølka som blir selt i Finnmark er frå Tine, er det nesten dødt løp mellom Tine og Q-Meieriene på Austlandet.
Det er sterk konkurranse mellom merkevarene også i landbruket. Q-Meieriene meiner konkurransesituasjonen er for svak, medan Tine meiner konkurransesituasjonen har utvikla seg kraftig, skriv Nationen.
Heile landet under eitt har Q-Meieriene ein marknadsdel på 28 prosent, medan Tine har resten. Q-Meieriene har størst marknadsdel i Vestfold, Akershus og Oppland, går det fram av tala.
— Der står vi side om side med Tine og konkurrerer. I dag har vi ikkje distribusjon til Troms og Finnmark. Det handlar om at vi ikkje klarer å halde mjølka haldbar lenge nok. I dag er haldbardatoen på mjølk berre inntil 15 dagar, så vi klarer ikkje den lange transporten, seier styreleiar Kristine Aasheim i Q-Meieriene.
Ho vil gjerne har større konkurranse i meierisektoren, medan Tine meiner at det er betydeleg konkurranse alt i dag.
— Enkelt fortalt er det slik at Tine definitivt har dei høgste marknadsdelane i klassiske distriktsfylke. Den enklaste grunnen til det er første og fremst at Q-Meieriene ikkje har valt å vere til stades i desse områda. Der vi kjempar om plassen og gunsten til forbrukarane, er historia ei heilt anna, seier kommunikasjonssjef i Tine, Ole Martin Buene.
