Vil få fart på bustadutvikling i kommunesenteret

Dette blei vedteke som eitt av fleire punkt i ei sak om tomte- og bustadutvikling under kommunestyremøtet tysdag. Saka har tidlegare vore gjennom formannskapet, der Øyvind Valen (Ap) fekk inn punktet om å få ei eiga sak om Revehallstomta.

Som følgje av vedtaket vil det i budsjettet for 2026 bli lagt fram forslag om å avsetja midlar til strategisk tomtekjøp i Ølen.

— Uhaldbar situasjon

Kommunedirektør Yngve Folven Bergesen skreiv utførleg om bustadutvikling i Ølen i saksutgreiinga. Han poengterte at Ølen er kommunesenteret, og at sentrale funksjonar som Sjøperlo/bibliotek, apotek, legevakt, senter og rådhuset ligg der. Eldretreff i Ølen er svært godt besøkt, og i dialog med Pensjonistforbundet Vindafjord kjem det fram at mange eldre set pris på Ølen som sentrum og trivst godt der.

— For framtidige og noverande helsetenester er det ein klar fordel å byggja ut konsentrerte bustader i Ølen, samstundes som me treng tilbod om bustader til yngre for busetjing i Ølen, skreiv Folven Bergesen.

I samband med arealdelen til kommuneplanen er det føreslått å leggja inn nye område for bustad på Litle Nerheim. Men i alle høve blir det ifølgje Folven Bergesen heilt sentralt og naudsynt at Vindafjord kommune tek ei aktiv rolle for å få utvikling i Ølen.

— Det er ikkje ein haldbar situasjon at ein ikkje er komne i gang med utvikling av fleire prosjekt for konsentrert bustadbygging i Ølen, skreiv kommunedirektøren.

Han ser det difor som naudsynt at det blir sett av ein sum til strategisk tomtekjøp i Ølen i budsjett og økonomiplan for 2026–2029. Dette er tenkt som ei investering for å setja fart på utviklinga av dei strategisk rette områda som er mogleg å utvikla til bustad etter at kommuneplanens arealdel er vedteken. Eit samrøystes kommunestyre innfridde dette ønsket.

Samarbeid med båtlag

Det er vidare tenkt at Vindafjord kommune skal gå saman med private utbyggjarar for å realisera strategiske område, og seinare forhåpentleg få investeringa tilbake etter kvart som område blir selde ut.

Revehallstomta er ein annan eigedom i Ølen som kommunedirektøren meiner bør utviklast til det beste for sentrum i Ølen. I 2019 blei ein konkurranse om å få kjøpa tomta avlyst av kommunestyret. Tomta ligg like ved båthamna.

— Ølen Båtlag er ein sentral aktør som må takast omsyn til i prosessen med utviklinga av tomta, skriv Folven Bergesen.

Kommunedirektøren varsla i saksutgreiinga at prosess knytt til utvikling av tomta er sett i gang, og at det kjem eiga sak på dette seinare. Politikarane såg det som så viktig at dei føydde til eit eige punkt om å få opp saka.

Leige for eldre

Demografiutviklinga med stadig fleire eldre er ein viktig bakgrunn for saka om tomte- og bustadutvikling. Kommunen har vore oppteken av å fremja sentrumsnære og praktiske bustader med eldre som målgruppe.

— Med tanke på det store behovet for mindre og konsentrerte bustader i åra framover og gapet mellom verdien på einebustadane og byggekostnaden for nye bustader, er utleigebustader eit verkemiddel som kan bidra til å løysa bustadbehovet for eldre i framtida, skreiv Folven Bergesen.

Han innstilte difor på at Vindafjord kommune gjennomfører opprusting av dei fem bustadane på Seljebakken som blei fråflytta før sommaren, og tilbyr desse bustadane til leige for eldre. Leiga følgjer kostnaden på investeringa, men blir sett lågast mogleg. Ho følgjer ikkje makssats for kommunale bustader. Dette blei vedteke som eit eige punkt av kommunestyret.