Brua til Atløy får ein prislapp på 4 millionar kroner per innbyggar på øya der det bur 450 folk. Leiar Arve Helle (Ap) for hovudutvalet for samferdsel og mobilitet i Vestland fylke, seier at ferjeavløysingsprosjektet på sikt vil lønne seg for fylkeskommunen.
Foto: Tone Gullaksen / NPK
Vestland seier ja til milliardbru
Fylkespolitikarane i Vestland sa torsdag samrøystes ja til å bygge den nye brua til Atløy i Askvoll, som skal koste 1,8 milliardar kroner. Fylkesadministrasjonen er uroa for at det vil forverre det store vedlikehaldsetterslepet.
Vedlikehaldsbehovet på dei over 2000 fylkesvegbruene i Vestland er kostnadsrekna til 5,3 milliardar kroner. 1100 av bruene er eldre enn femti år og 70 bruer har stor eller svært stor skade på bereevna.
– I verste fall, dersom det går langt nok, må vi stenge bruer for trafikk, seier direktør for infrastruktur og veg, Dina Lefdal, i Vestland fylkeskommune, til NRK.
