Travle tider ved slaktebenken

Ved det store slakteriet i Ølen strøymer det på med slakteklare sau og lam frå fjern og nær. Over 150 ekstra par hender er sett inn for å ta seg av den auka slaktemengda som i løpet av nokre få hektiske veker skal klargjerast og sendast vidare ut til kundar og butikk-kjeder over heile landet.

I løpet av sist veke gjekk 11.700 sau og lam under slaktekniven. Det var den travlaste veka så langt i sesongen. Men meir arbeid ventar etter kvart som dei slakteklare dyra blir henta inn til det privateigde slakteriet frå Sognefjorden i nord til Notodden og Ryfylke i aust og sør. I år som i fjor er tilgangen på dyr stabil.

— I vårt distrikt har me likt med leveranse som i fjor, fortel dagleg leiar Svein Fatland, som godt nøgd med lammesesongen så langt.