Slik ser området ut i dag.Skjermdump Google Streetview.
Snart avgjerd for Ivelandstomta
Etne kommune lyser ut høyring for ei mindre endring av reguleringsplanen for Ivelandstomta i Etnesjøen. Endringa er ein del av ein prosjektkonkurranse som skal gi nye moglegheiter for utvikling av området.
Kommunestyret i Etne vedtok i juni å lysa ut ein prosjektkonkurranse for eigedomane i Etne sentrum. Eigedomane er i kommunalt eige, og nå er bygningane rivningsklare. Målet med konkurransen er å tildela eigedomane til den som kan levera den beste totalløysinga for vidare utvikling av området, blir det opplyst på Etne kommune sine heimesider.
For å gjennomføra prosjektet, må gjeldande plan for dei to eigedomane justerast litt. Endringa er avgrensa til nokre få føresegner og er omtalt i planomtalen. Etter plan- og bygningslova skal forslaget til endring kunngjerast for alle som kan bli påverka, inkludert eigarar, festarar og andre interesserte partar. Dei som har innspel, kan sende merknader til Etne kommune innan fristen 11. november.
Når høyringsfristen er ute, vil forslaget bli lagt fram for planutvalet i Etne kommune. Planutvalet har fullmakt til å godkjenna endringa gjennom ein forenkla prosess, og eit eventuelt vedtak vil bli kunngjort i Grannar, med informasjon om klagefrist.
