Den gamle bobla med sin norskproduserte hengar passar fint til campingferie for eigaren i Vikebygd.
Foto: Ronny Andrè Gjerde
Set kursen for landevegen
Ein liten spørjerunde i regi av Grannar i Etne og Vindafjord viser at bil- og campingferie står høgt på lista når årets sommarfeire skal planleggjast. Ikkje alle får feriedraumen realisert denne sommaren, og mange må sjå langt etter utanlandsturen dersom myndigheitene fortsatt vel å halda grensene mot Europa stengt. Koronapandemien har sett ein grundig stoppar for reiselystne nordmenn som lengtar etter sydenvarme, krittkvite strender og eksotiske reisemål, men for Elin Johnsen frå Skjold har ikkje rådet om å feriera i heimlandet sett ein dempar på utferdstrangen.
— Me skal reisa med bubil i Sør-Noreg, og det var planen i utgangspunktet, seier skjoldabuen og gler seg til sommarferien.
Ho er ein av mange nordmenn som set kursen via landevegen i ferien. Halvparten av dei ti personane Grannar møtte på gata svara at dei ville reisa med bil, bubil eller på campingtur i sommar. Éin av dei spurde ville vera heime, to personar hadde ingen planar, ein såg føre seg fisketur og ein håpa å ta turen til Danmark som planlagt.
