Set bustad og kosthald på agendaen

I sommar blei Pensjonistforbundet Vindafjord stifta med 19 personar på medlemslista. I dag har talet auka til 50 medlemmer og fleire saker som laget ønskjer å fremja ligg alt på bordet. Mellom anna ser forbundet behovet for bustader tilrettelagt for eldre og personar med funksjonshemming. Nyleg tok forbundet, med leiar Anne Karin Hårajuvet og sekretær Anne Brit Klungland i spissen, kontakt med ordførar og leiing i Vindafjord kommune for å setja søkjelys på bustadpolitikken.

— Me kom med innspel til kommunen og møtte ordførar Ole Johan Vierdal og kommunalsjef for Samfunnsutvikling Halfdan Krohn Brekke. Det var veldig positivt. Dei ville ta kontakt med Husbanken som kan gje rettleiing om tilskot og låneordningar, seier leiar Anne Karin Hårajuvet (72) og nestleiar Sverre Andersen (75).

Talet på eldre aukar og behovet for ein plass å bu der ein har tilgang til butikk, lege, heimesjukepleie og andre tenester melder seg med åra. Dette meiner pensjonistforbundet kan løysast ved mellom anna ved å leggja eksisterande bustader til rette eller byggja nye bueiningar i sentrale strøk der bebuarane kan dela på eit fellesareal.