Sekse er ny kommunedirektør

Åsmund Andersen Sekse har vore konstituert som kommunedirektør i Etne sidan Filippo Ballarin slutta i stillinga. Etter åtte månadar i midlertidig rolle fekk han onsdag tillit frå heile kommunestyret til å ta over på fast basis.

Rekrutteringsprosessen har vore leidd av selskapet Madssen og Brekke i samarbeid med arbeidsgjevarutvalet, hovudtillitsvald i Utdanningsforbundet og hovudtillitsvald i Fagforbundet. Det kom inn ti søkjarar til stillinga, fem blei kalla inn til førstegongsintervju og fire gjekk vidare til andre runde.

– Prosessen har vore grundig, med både intervju, evnetestar, personlegdomsanalysar og referansesjekk. Til slutt stod me igjen med fleire sterke kandidatar, men fleirtalet i rekrutteringsutvalet og rekrutteringsbyrået meinte at Sekse var den rette, sa ordførar Mette Heidi Bergsvåg Ekrheim (Sp) i møtet.