Riggar seg for anleggdrift i tre år
Årstalet 1920 står på den kvite veggen på kraftstasjonen i Litledalen. Eit byvåpen med tre måkar viser at det var Haugesund kommune sitt kraftselskap som først tok i bruk vassressursane frå fjellområdet ovanfor. SKL-logoen er også kome på plass, som indikasjon på at Sunnhordland Kraftlag har overtatt stafettpinnen og skal fullføra utbygginga som Haugaland Kraft starta med å legga planar for.
I heile haust har SKL rigga seg til for tre år med anleggsdrift og kraftutbygging i Litledalen og Hardeland. Dei rike vassressursane i området skal utnyttast betre ved modernisering og nytt kraftverk i fjellet under Løkjelsvatnet.
— Me starta opp i oktober med førebuande arbeid som skogrydding, riggplassar, kabelgrøfting, vegutbetring og forskjering for tunnel . Nå er anlegget rigga og den første salva på den store tilkomsttunnelen er like rundt hjørnet, fortel kvinnheringen Terje Sandvik som skal leia utbygginga med ein prislapp på rundt 500 millionar kroner.
