Pandemien løftar hyttesalet
21Etterspurnaden etter nøkkelferdige hytter synest å ikkje ha nokon ende. Begge aktørane i Grannar-distriktet har meir enn nok å henge fingrane i. Og i koronatida har talet på telefonar berre auka.
Både Berge Sag, med hovudkontor i Ølensvåg, og Tungesvik Bygg i Skånevik fortel om etterspurnad som dei aldri har opplevd før.
— 2019 var all time high innan hyttesal Berge Sag. I år er me 30 prosent opp frå det året, og vi har aldri sett maken til inngang på eit år som det vi har framfor oss, fortel sals- og marknadsutviklar Øyvind Bråtun i Berge Sag.
For Berge Sag sin del handlar det ikkje berre om at folk har blitt generelt meir interessert i å skaffe seg hytte gjennom korona-tida, men at dei også har gått frå å vere ein regional aktør til å no satse på hyttebygging i heile Sør-Noreg. Seinast førre veke vart det kjend at dei også satsar i Østfold gjennom oppkjøp av ein annan aktør. Medrekna dei siste oppkjøpa reknar Berge Sag med å omsette for om lag 200 millionar kroner berre i hyttemarknaden neste år.
