Opnar opp camping og båthamner

Dei fleste av campingplassane her til lands har ein stor del heilårsgjester som brukar campingvogn og bubil som hytte. Etter at korona-pandemien slo til for fullt måtte campingplassar stengja dørene for sine gjester, men nå kan også dei opna opp for faste gjester.

Vindafjord har til saman fem campingplassar og éin bubilparkering, og Etne kommune kan tilby innkvartering på fem campingplassar. Ved Ølmedal camping i Vindafjord og Kyrping camping i Etne står vogner og hytter klare til bruk, og når finvêret slår til ventar vertskapet storinnrykk.

— Me håpar folk kjem, og blir det fint vêr kan det bli masse folk. Me kjem til å opna dersom det ikkje kjem andre restriksjonar, seier Guri Hustveit ved Ølmedal camping som opnar opp heile campingplassen med 60 heilårsplassar og tre hytter frå og med i dag.