Nytt treffpunkt har blitt populært
Svandal rekna kanskje ikkje med at Rikard Seltveit, Endre Eide og Magne Økland jamleg skulle dukka opp. Rett nok er dei tre pensjonistar, men dei bur ikkje i Imsland. Bygda har likevel ein sentral plass i livet deira. Endre Eide og Rikard Seltveit gifte seg til bygda og har fritidsbustad der. Magne Økland arbeidde eit langt yrkesliv som rådgjevar for bønder i det som etter kvart blei Tine.
— Det er vel kanskje ingen gardar eg ikkje har ete lunsj hos, så mat og drøs her er naturleg for meg, seier Økland.
Rikard Seltveit er skihopparen frå Arabygdi i Telemark som gjorde saudabu av seg. Han gjorde så mykje godt arbeid for idrettslaget at han i dag er æresmedlem der. Kona hans, Laura Seltveit, fødd Imsland, døydde i 2020. Ho var kjend som ordførar i Sauda i åra 2005 til 2011.
