Vekta på eit storfeslakt har i gjennomsnitt auka med 40 kilo sidan 1990-talet. Samstundes har feittinnhaldet i stykningsdelane høgrygg, bogsteik, flatbiff, mørbrad, rundsteik, bankekjøt, entrecôte, indre- og ytrefilet og karbonadedeig auka med åtte prosent.
Foto: Heidi Molstad Andresen / NPK
Norsk storfe er blitt feitare
Både fôr, avl og rasesamansetning gir utslag på slaktevekt, kjøtfylde og feittinnhald i husdyra. Dei siste åra har det blitt jobba systematisk for å auke kjøtinnhaldet og redusere feittprosenten hjå både svin, lam og storfe. Hjå svin er feittprosenten i eit utval stykningsdelar dei siste 30 åra gått ned med 7 prosent, medan utvalde stykningsdelar i dagens lammekjøt inneheldt 27 prosent mindre feitt enn før.
I storfekjøtet har feittinnhaldet i dei analyserte stykningsdelane derimot auka med 8 prosent, fortel Karianne Spetaas Henriksen, som er fagsjef for ernæring hjå Animalia. Onsdag la dei fram sin nye rapport Kjøttets tilstand».
Underskot på storfe
Spetaas Henriksen forklarte auken i feittprosent hjå storfe med at storfenæringa har tilpassa seg marknadssituasjonen og at dette truleg har overskygga effekten av avlsarbeidet. Med lågare etterspørsel av mjølk og høgare mjølkeyting på kyrne, har det over tid blitt behov for færre mjølkekyr:
– Sjølv om det har vore ein auke i ammekyr har det ikkje kompensert for reduksjonen i mjølkekyr. Over tid har me difor i lange periodar hatt underskot på storfe og fått høgare slaktevekt. Storfeslakt i dag er 40 kilo tyngre enn i 1990. Då får ein og meir feitt, sa Spetaas Henriksen, som også påpeika at delen metta feitt i storfekjøt har auka med heile 36 prosent.
Nye avlsmål for NRF
Tidlegare var det også avla meir Norsk Raudt Fe, medan den spesialiserte storfekjøtproduksjon i dag utgjer ein større del av produksjonen. I tillegg har kvar enkelt rase endra seg genetisk gjennom avl, sa Karianne Spetaas Henriksen:
– I 2023 vart avlsmåla for Norsk Raudt Fe justert. Det vil bidra til at NRF-kyr i framtida ikkje vil auke i vekt slik me har sett dei siste ti åra.
Dei nye næringstala er eit resultat av at Animalia mellom 2020 og 2023 har analysert energi- og næringsstoffinnhaldet i kjøt frå storfe, svin og lam. Informasjonen er no lagt inn i Matvaretabellen, som blir brukt som datagrunnlag i kosthaldsundersøkingar og i helsestyresmaktene sine kosthaldsråd. Somme av tala som har vore nytta fram til i dag, er opptil 30 år gamle.
(NPK)
