Mange meiningar om marknaden
Rundt 60 personar møtte til idédugnad på Skakke i Etne då framtida til Etnemarkanden stod på programmet, og det skorta ikkje på forslag frå salen då marknadsleiar Kurt Helgesen og Frode Robberstad opna for ordet fritt under folkemøtet i Skakke torsdag kveld. Dei siste åra har både talet på utstillarar og publikum gått nedover og for å få marknaden på fote igjen ynskjer leiinga på draghjelp frå publikum.
— Eg har tru på at me skal skapa ein god marknad i framtida, og då treng me gode forslag frå folket, sa Kurt Helgesen og nytta høvet til å takka alle lag og dugnadsfolka som stiller opp år etter år.
Helgesen drog fram dei positive sidene ved årets marknad, som gode tilbakemeldingar frå utstillarar, eit levande landbruksområde, Eldhugparken, matområdet med matkonseptet Etnir Duggurd og marknadsdansen, og meinte framtidas marknad ikkje nødvendigvis bør streva etter å bli like stor som i glansdagane då publikumstalet låg opp mot 40.000.
