Makalaust med country

Helga lakkar og lir mot slutten, og Makalaust er godt i gang med si faste søndagsøving i fjøset til ein av bøndene i bandet. Det er nemleg fleire av dei, bøndene altså, og ein heil kabal som må løysast for å kunne samla gjengen på ti bandmedlemmer til øving ein gong i veka. Men søndagane kan dei, og desse øvingane har blitt eit høgdepunkt for den etterkvart samansveiste gjengen.

Makalaust – som bandet heiter, er ikkje fylt tre år enno, men likevel har dei markert seg i distriktet. Om ikkje lenge kan dei visa til spelejobbar i dei fleste bygdene i både Etne og Vindafjord, og sist helg venta spelejobb på Fogn. Utedans i strålande sommarvêr.

— Det er slike oppdrag me verkeleg likar. Dans der folk får svinga seg, og stemninga er god, seier Håvard Matre som er gitarist i bandet.