Styreleiar Elling Hetland opplyser at Haugaland brann og redning vil gå inn for endringane KPMG tilrår i rapporten. Her saman med brannsjef Dag Botnen då dei var i kommunestyret i Vindafjord tidlegare i haust.
Foto: Jon Edvardsen
Leiinga kom med sin versjon av striden i brann- og redningsetaten
Styreleiar Elling Hetland i Haugaland brann og redning presenterte ein forsvarstale for det styret har gjort for å få ro i selskapet. — Perspektivet til styret er å arbeide til beste for selskapet, sa han til kommunestyret i Vindafjord.
Både styreleiar Elling Hetland og brannsjef Dag Botnen presenterte sin versjon av striden i det interkommunale brannselskapet i møte med politikarane i Vindafjord. Tidlegare på dagen var dei i Suldal i same ærend for å informere om konfliktar og varsel som verserer både internt og i media.
Det føregår med andre ord brannsløkking både internt i selskapet og overfor eigarkommunane på Haugalandet.
Kommandolinjene mellom eigarane og selskapet er slik at det er styret og dagleg leiar som informerer kommunane. Der har brannkorpsa lokalt ingen rolle.
