Lei av å plukke knuste speglar
— No har eg høyrd om at det skal bli nytt kryss i snart 12 år. Kor blir det av? undrar Sindre Jacobsen.
Grannar treffer han ved det farlege Mørkelikrysset på E134, rundt fire kilometer vest for Etne sentrum, der ein kan svinge av til vegen mot Bjørgjo. Her har mange trafikantar, særs dei som kjem ned frå Fikse frå vest, fått seg ein støkk når dei kjem rundt bergknausen og brått møter eit køyretøy som skal mot Bjørgjo, som står og ventar på svinge av vegen.
Etnebuen har vore næraste nabo til krysset i fleire år, og som dagpendlar mellom Etne og arbeidsplassen Westcon i Ølensvåg, blir han framleis dagleg brukar av vegen sjølv om han straks flyttar inn i nytt hus på Børkjenes.
