— Kjekt å vera med i ungdomskor

Til vanleg er dei ni jenter i Etne ungdomskor, men denne øvingsdagen er dei ei i minus. Likevel er det god lyd i gjengen, spesielt når dirigent Audny Aasheim finn fram musikken til Imagine Dragons på Spotify, og guffar opp lyden. Då går det ikkje lenger an å sitja på stolane sine for å syngja. Opp å stå, for å få best mogleg lyd og energi ut i rommet.

— Å vera med i Etne ungdomskor er veldig kjekt. Me har eit godt og koseleg miljø, og det er kjekt og lærerikt å vera med å syngja, seier Emma Haraldseid Grindheim (18).

Og ein kan ikkje anna enn å tru på 18-åringen, for ho har vore med i koret sidan oppstarten på våren i 2016, ho tar bussen kvar einaste tysdag tur-retur Etne frå Haugesund for å vera med, og nettopp denne tysdagen er ho hås som eit esel, men møter til øving likevel. Så noko må det rett og slett vera med dette ungdomskoret.