Innblikk i den tøffe kvardagen til yrkessjåførane

Det var Norges Lastebil-Eierforbund (NLF) avdeling Agder og Rogaland som hadde utfordra samferdselspolitikar Tom Kalsås frå Algård med på ein køyretur på E1134, frå Karmøy til Løvebakken i Oslo.

— Som rogalending er det på E134 dei største utfordringane ligg, ikkje minst mellom Solheim og Bakka i Stordalen, seier Tom Kalsås til Grannar.

Blei utfordra

Bakgrunnen for turen var ei utfordring frå NLF i fjor haust før Kalsås hadde hamna på Stortinget. Som kjent gjorde Ap eit godt riksval og med Hadia Tajik i statsrådpost blei det stortingsplass til fjerdekandidat Kalsås. Han fekk også ønsket om å bli del av Transport- og kommunikasjonskomiteen, innfridd. Der sit også Terje Halleland (Frp) frå Vindafjord, som gjer at Rogaland i denne perioden har to representantar i den viktige komiteen.

— Eg har frå før jobba mykje med samferdselssaker i Rogaland fylkeskommune og har vore med og utforma Ap sitt partiprogram, så dette er ein posisjon eg gler meg til å gå inn i, seier Ap-representanten.

Sjølv om han som privatperson er godt kjent med E134, meiner han det blir nyttig å oppleva vegen frå eit anna perspektiv; frå passasjersetet på eit stort vogntog. Kalsås fekk også ønsket oppfylt med å ta denne køyreturen om vinteren for å oppleva utfordringane som yrkessjåførane har langs denne vegen når det er glatte vegar. Då dei starta frå Karmøy låg det an til kolonnekøyring over Haukeli.

Detaljregulerieng

Kalsås lovar å arbeida hardt for å få realisert ny veg på strekkja Solheim i Vindafjord til Bakka i Etne, som først kom inn i Nasjonal Transportplan 2022-2033 etter at Stortinget hadde behandla saka.

— I første omgang er oppgåva vår å jobba mot Statens vegvesen for å få strekkja i Etne og Vindafjord detaljregulert, og deretter å få byggestart i første del av planperioden, seier Tom Kalsås.

Først ut er likevel tunnelen mellom Seljestad og Røldal som kan få byggestart i 2023. Han opplyser at stortingsmeldinga om dette store vegprosjektet etter planen skal behandlast i Stortinget i løpet av våren.

Sjåfør Endre Krakk sitt bodskap til passasjeren er at Solheim – Bakka er den verste strekninga på heile E134 og at det hastar med å få til oppstart av det lenge planlegget veganlegget. Han er også svært glad for at Seljestadtunnelen nå skal byggast ettersom partiet opp og ned frå Røldal i dag er den største utfordringa for yrkessjåførane, spesielt på vinterstid med mange bilar som køyrer seg fast.

— Det ligg dessutan ei stor innsparing både på drivstoff-utgifter og for miljøet å få denne tunnelen bygd, seier den erfarne yrkessjåføren frå Vats.