Industriområde i grenseland

På Fikse, like opp mot kommunegrensa til Vindafjord, har det vore full aktivitet med skoging dei siste vekene. Deler av området er rydda på oppdrag av Etne kommune, medan private grunneigarar har kasta seg med i skogryddingsarbeidet og får skogen hogd på sine eigedomar. For rundt ti år sidan blei deler av området på Fikse planlagt som industriområde, men fram til nå har lite skjedd for å klargjera området for framtidig etablering av verksemder.

Bjørn Eikemo, leiar utvikling i kommunen opplyser at det blir skoging i første omgang. Kva som skal gjerast vidare er ikkje bestemt.

— Me må ha ei avklaring politisk til korleis det skal løysast, og det er det ikkje tatt stilling til. Området er regulert til industri, men om kommunen skal opparbeida arealet eller selja råtomter er ikkje avgjort. Vatn og kloakk må også løysast, seier Eikemo.