Her har skip hatt botnkjenning

Djupna ved den kommunale kaia på næringsfeltet Tongane i Etne er for lita for moderne lasteskip. Nokre skip har opplevd botnkjenning når dei har lagt til kai, og fleire skip må redusere planlagde laster til kaia. Dermed blir verksemder belasta med fleire skipsanløp per år enn det som elles ville vere naudsynt.

Treng 6-7 meter

Etne Betong, Fiskå Mølle, Oddvar Flatebø Maskinutleige, NCC, MCE og Felleskjøpet Etne har difor gått saman om å ta opp problemstillinga med eigar, Etne kommune. Før jul hadde nokre av aktørane eit møte med kommunen. Det munna ut i semje om at dei skulle skrive eit brev kor dei konkretiserte behova sine.