Heimebanesiger og folkefest i Imsland

Fleire hundre tok turen til Imsland for å få med seg løpet. Allereie frå tidleg på føremiddagen var det folk å sjå i og rundt løypa, der både familiar, mosjonistar og aktive samla seg.

Rundt løypa var det drikkestasjon, og ved målområdet ved Bygdahuset kunne publikum og deltakarar få seg grillmat, saft og kake. Klokka 14:00 gjekk startskotet for konkurranseklassen, og fem minutt seinare blei barneløpet sparka i gang.

– Det er 60-meter spurt heilt frå start, sa mangeårig Ølmedal Rundt-speaker Tor Øyvind Skeiseid med glimt i auga då dei yngste deltakarane sprang avgarde.