Haustferiemoro på biblioteket

Inne på biblioteket i Etne yrer det av liv. Det er midt i haustferien og aktivitetsdag på biblioteket, og dei unge bibliotekgjestene er i full gang med dagens oppgåver. Ein gjeng teikneglade ungar har funne fram fargeblyantane og tryllar fram vakre teikningar, medan andre har kasta seg over perlebrettet for å laga fargerike motiv med perler. Dei mest speleglade gjestene har benka seg framføre datamaskinen og i lesekroken har ein liten gjeng funne fram ein stabel med bøker dei vil kosa seg med.

— Eg går ofte på biblioteket, men det er første gong eg er på aktivitetsdag i haustferien. Det er veldig kjekt, seier dei to 10-åringane Mai-Linn Grindheim Hardeland og Siren Skjøllingstad Eikemo.

Dei to jentene har laga kvart sitt perlebilde og nå er dei godt i gang med å dekorera ein liten tøypose som enten kan brukast til oppbevaring av 3-på-rad-spel eller som pose for mobilen.