Hageguru samlar fullt hus

Den internasjonalt kjende hageguruen skulle eigentleg vore gjest hos Etne Hagelag for to år sidan. Pandemien sette ein stoppar for det, og det same gjentok seg eitt år seinare. Men nå er alt duka for at arrangementet på Skakke kan gjennomførast komande tysdag.

— Me kryssar fingrane for at ikkje noko uføresett skulle dukka opp denne gongen også. Dette gler me oss stort til, seier Marta Onstein, leiar i det lokale hagelaget.

Ho omtalar Claus Dalby som den største stjerna innan hagelagsfeltet i Norden. Onstein har vore så heldig å få besøkt hans private hage i Århus og lært han å kjenna som ein hyggeleg person. Dansken er også kjent for sine gode føredrag der presentasjon av flotte bilde står sentralt.