Ein sparer både tid og pengar dersom ein stoppar ladinga av elbilen når han har nådd 80 prosent, ifølgje Naf.
Foto: Gorm Kallestad / NTB / NPK
Gode råd om lading av elbilen
NPK-NTB: Å fullade elbilen er både dyrt, tidkrevjande og unødvendig, seier Naf, som har ein klar beskjed til alle sommarbilistar: Det held å lade til 80 prosent.
— Rådet vårt til alle som skal hurtiglade, er at dei ikkje ladar elbil-batteriet til meir enn 80 prosent. Hovudårsaka er at dei siste 20 prosentane gjerne tek veldig lang tid å fylle, seier senior kommunikasjonsrådgivar Nils Sødal i Naf.
— Det blir dyrt for deg, og i tillegg bidreg lang ladetid til auka kø og irritasjon ved ladestasjonane, seier han.
Ei fersk undersøking frå samferdselsorganisasjonen viser at over 200.000 elbilar skal ut på vegane i sommarferien. Dermed kan det liggje an til kø på ladestasjonar rundt om i det ganske landet.
– Du sparer både tid og pengar på å heller avslutte ladinga og leggje inn ein kort ladestopp til viss du treng det, framfor å lade til 100 prosent på ladestasjonen, lyder sommartipset frå Sødal.
