Gjekk betre enn frykta

Onsdag var det varsla ekstrem høg vass-stand i Sunnhordland og Rogaland som følgje av uvêret Didrik» som feia inn over landet. Heldigvis blei det ikkje så høg springflo som frykta, men ved kaien i Vikedal fann sjøvatnet vegen langt innover kaiområdet onsdag ettermiddag. 74 år gamle Harald Stølsmark var ein av fleire som tok turen til småbåthamna i eitt-tida onsdag for å sjekka vass-standen.

— Eg har ikkje sett vatnet så høgt i småbåthamna, men det var visst litt høgare i 2017. Då var det meir uvêr og meir vatn i elva, seier vikedalsbuen.

Like ved båthamna ligg fleire sommarhus og bustadhus på rekkje og rad, og for fleire av desse kom vatnet faretruande nær husveggen. Eitt av sommarhusa hadde fått vatn langt opp på veggen, medan for dei fleste gjekk det bra.