Fryktar at den offentlege skulen vil bli svekka

— Me ser positivt på engasjementet og initiativet kring eit alternativt skuletilbod, men me må òg ta ansvar for heilskapen i det offentlege tilbodet. Vår vurdering er at etableringa av ein Montessoriskule på Bjoa mest truleg vil svekkje det offentlege skuletilbodet i Vindafjord, både økonomisk og fagleg, seier kommunedirektør Yngve Folven Bergesen i ei pressemelding.

Ideen om ein Montessoriskule kom etter at kommunestyret vedtok å leggje ned skuledelen ved Bjoa oppvekstsenter frå hausten 2025. Nokre foreldre starta etter kvart Vindafjord Montessoriskule AS og sende ein søknad til Utdanningsdirektoratet (Udir) om å starte opp frå hausten 2026. Thomas Alsseike er styreleiar og har med seg Marianne Cederløv og Rannveig Hetland som styremedlemer, og Unn Johannessen Vølstad som varamedlem.

Udir har bedt kommunen om å komme med ein uttale om Vindafjord Montessoriskule AS sin søknad. Uttalen skal behandlast i Utvalet for oppvekst og omsorg (OPOM), formannskapet og ungdomsrådet, før kommunestyret gjer eit endeleg vedtak 17. juni.