Flyttesjau og større lokale

Flyttesjauen er i full gang ved brillebutikken på Etne senter. Hyller skal tømmast, varer flyttast og vegger skal rivast, og om nokre hektiske veker skal alt vera på plass i nye lokale.

—Me har planar om nyopning 13. november. Det skal bli godt å få nytt. Lokalet me har i dag er for lite, seier Sigrid Mokleiv Sævareid.

Ho har jobba i butikken sidan starten i 2007, og gler seg til det nye lokalet står ferdig. Den nye butikken, som nå også tek i bruk det tidlegare lokalet til Systova, får mellom anna nytt og romsleg prøverom, eit klinikkrom som kan gjerast om til ekstra synsprøverom på eit seinare tidspunkt, eige pauserom til dei tilsette og god plass til varene.