Fleirtal for å overta tomteselskap

Mot Framstegspartiet sine to stemmer gjekk formannskapet i Etne inn for kommunedirektøren sitt forslag om å kjøpa alle aksjane i Etne Tomteselskap AS for kroner 1 per aksje og samstundes overta selskapet si gjeld som er rekna til rundt 8,36 millionar kroner. I forslaget heiter det også at Etne kommune ettergjev råarealkravet på tomt nr. 16, 32 og 41, noko som utgjer totalt kroner 300.000 og at kommunedirektøren får fullmakt til å gjennomføra overtakinga og vidare handsaming av selskapet fram mot avvikling.

Overtakinga blir finansiert gjennom investeringsbudsjettet, og lånet lagt til i kommunalbanken.

Etter eit tilleggsforslag frå Ap blei det også vedtatt at administrasjonen skal gjera ei aktsemdvurdering for å sikra at det ikkje ligg juridiske krav mot tomteselskapet som seinare kan rettast mot kommunen etter overtakinga.