Skadar som oppstår ved vanlege situasjonar når sjukepleiarar eller helsefagarbeidarar hjelper eldre, kan utløyse rett til yrkesskadeerstatning, ifølgje eit forslag som no blir sendt på høyring.
Foto: Gorm Kallestad / NTB / NPK
Fleire kan få rett til erstatning når dei skader seg på jobb
Regjeringa vil endre erstatningsreglane for folk som skader seg på arbeidsplassen. No krevst det ikkje lenger at skaden oppstod under uvanlege forhold.
I dag er det slik at skaden må ha oppstått som resultat av ei uvanleg belastning, men det vil regjeringa endre på.
– Dagens regelverk er ikkje tilpassa røyndommen i mange yrke. Risiko er risiko, same kor vanleg han er i jobben, seier arbeidsminister Tonje Brenna (Ap) i ei pressemelding.
