Festar kvardagslivet til lerretet

Gjennom sin særeigne stil og sprudlande fargeglede skildrar Gudrun Røyneberg livet som blir levd i små samfunn. Sjølv kallar ho seg forteljarkunstnar, og gjennom sine detaljrike bilde skildrar ho både fellesskap, einsemd, leik, alvor, samhald og utanforskap. Bileta består nesten alltid av hus og folk som driv med sine kvardagslege syslar, og kikkar ein godt etter kan ein oppdaga bonden som pløyer marka, den vesle guten som leikar seg med fotballen eller ungjentene som slår av ein part når dei treffest på landevegen.

— Eg har ingen kunstutdanning, men eg fann veldig fort min eigen stil og utrykk. Eg har alltid hatt skaparglede og teikan mykje som barn. Og eg likar å formidla. I bildene mine må det liggja ei forteljing, seier Gudrun Røyneberg som først greip til penselen i ein alder av 64 år etter å lagt jobben som lærar i skule og fengselsvesenet på hylla.

— Det er aldri for seint å realisera ein draum, seier ho.